最近好大隻的胡力威師傅，好大力咁同大家講：「畀啲掙扎！」熱爆社交平台，配合社會和運動界熱sell的一個訊息：堅持，不放棄！

與失敗掙扎三個回合

一世人流流長，邊個未試過挫折、失敗、不如意，最快的解決方法莫過如即閃，quit。同「魔鬼老闆」不咬絃，覺得佢搵放大鏡找你的納米錯，唔啱feel，即resign，上晝返工，下晝失蹤，痛快！

從大數據中可以證實「魔鬼老闆」呢類生物，是隨機分派的，即每間公司，或者同一間公司在不同樓層，總會有幾隻，轉去另一公司或崗位，好有可能又會遇上，不是你黑仔，只是或然率的效果。

其玩快閃，不如學識如何打大佬，學習與「魔鬼老闆」共舞，甚至快樂生活。而且魔鬼唔魔鬼，從無國際定義，只是隨口嗡的一個標籤，你話老細魔鬼，佢都確診你是低能仔，終審庭都判定唔到邊個係人，邊個係鬼。不如學下提升自己的戰鬥力，好過walk away！

遇到難題困擾，輸了第一個回合，埋繩角抖抖回氣，檢討、改良、再戰；輸第二回合，知是一場硬仗，掙扎，再fine tune落敗原因，提升關鍵能力或態度，唔好發爛渣，再抽多一個回合。我建議與失敗對抽三個回合才決勝負，老套講句，失敗是學嘢最多的時候，雖然有啲RTHK feel，卻是堅。放棄了，你一世都會輸俾魔鬼。

不過如果對抽三個回合都輸，你要冷靜下來，想想是否自己力已盡。是的話，二話不說，要抽身，改變！因為再糾纏落去，只會輸得更甘，直至冇得翻身。要識得放下，let go，不要連信心都輸埋，咁你就真正的破產了！

一個處境如是，學習一項新技能如是，處理一段關係如是，同自己訂個合約，與失敗掙扎三個回合，然後才華麗轉身！一個人的歷練、智慧、戰鬥力，是這樣練成的。

把問題定過期日

工作上遇到不如意，與女友關係進入作戰狀態，stay or quit？堅持好痛苦，棄賽好徬徨？好掙扎！

其實所有問題都有過期日，正如食物、藥品、搓手液都有expiry date。困擾有限期，不會天荒地老。假設把同老闆關係的問題定一個月為過期日，過期前，問題仍是有效的，把它置於枱面，是你的甲項工程，投放洪荒之力和時間，做解決師。例如分析老細最唔妥你的是能力定態度？可否改善或提升？請教以前同佢合作過的幸存者，有甚麼survival skills？

盡最大努力去解決，不猶豫，不抱怨，目標為本，問題過期前都要掙扎。好，一個月過去，做個檢討，若果同老闆關係改善，佢開始畀番啲like你，你也知如何做得中他心意，mission completed，出部貴手機作自我獎勵。

若不幸問題依舊或更惡劣，你經一輪掙扎努力都係無成果的話，算，要了斷，cut loss，一係quit (如果有機會)，一係接受你暫時沒有能力解決這個問題，一段時間內你唔會有機會上位，會有紅圈，預左硬啃老細幾個白眼。總之這個問題已過期，要落畫，你的時間和精力轉去解決另一問題或尋找新機會。

戰鬥過、掙扎過，不要浪擲青春，一係接受，一係改變，兩個只能活一個 (see，幾有智慧)！總之唔好發爛渣，(已第二次提你)，又唔接受，又唔肯改變，胡力威師傅會出嚟同你掙扎下，驚未！

文：孫立民
商管博士，僱員服務公司首席顧問，見盡職場百態，拆解辦公室求生術。

investMAN
For People of Style & Substance
掌握理財智慧 感受生活品味
http://investMAN.hk