【李華華Online】TVB新聞部推返7放7更 員工：變相扣假
蘋果日報 2020/03/24 21:34
電視廣播李華華
TVB新聞部推返7放7更，員工叫晒救命。
武漢肺炎疫情肆虐下唔少公司都實行WFH（在家工作）保持營運，自從傳媒機構相繼感染武漢肺炎後，電視廣播（511，TVB）決定實行dirty team同clean team。
公司今日同新聞部員工講，為預防節目不被癱瘓，部份同事會輪放一星期，亦會分AB team，其中一team會長駐外邊採訪，不幸出事都唔會交叉感染總部嘅同事。員工基本上實行以返七日放七日，但放假嘅就要扣除自己嘅補假或年假。
華華聽聞，TVB呢個計劃暫時會實行三星期，有員工呻器材工具都會輪用，實行上嚟好多限制，交叉風險其實冇減少，覺得TVB咁做咁做似做騷，避免萬一有同事確診後被批反應慢，又話咁做即係變相扣年假，節目長度又冇縮短，加上新聞部本身都唔夠人，實施之後每team可能得三、四人，一個人要做兩樣野，工作量會加大，而且公司冇主動派口罩之餘，仲要唔比員工戴黑口罩，覺得真係好無奈咁話。
李華華