【新增影片】
星期二德國對英格蘭場U21歐國盃四強，先講開一隊波有個好門將幾咁重要，但周三荷甲球會烏德勒支開操，佢哋新簽嘅門將歷克馬斯文，首課操練就喺新隊友面前出醜。

當時正進行練習賽，歷克馬斯文面對另一方隊友嘅頭槌攻門，明明佢個企位啱啱好可以接實，點知就一個「牛油手」，個波就漏後入埋網，真係瘀爆！

歷克馬斯文兩日前先同烏德勒支簽約，之前喺川迪踢咗六年，大約四年前站穩正選，但就未入過荷蘭國家隊。烏德勒支買佢前，總經理坦夏治仲向球迷話呢位門將個人質素強同埋好冷靜，家下馬斯文好似摑咗高層一巴。不過，都係練習賽啫，馬斯文可能熱身未夠，比賽時唔好再出洋相就得喇！