懷孕七個半月嘅名模AnaR.，今日去到天際100，出席一個慈善拍賣活動，拍賣品中有佢親自繪畫圖案嘅成長椅，稍後拍賣得善款將撥捐受尼泊爾地震影響兒童。

AnaR.表示不時都睇育嬰書，屋企經已為BB女準備好由衫至嬰兒床等用品，亦喺家中安裝閘門，以防狗狗走入BB房，問到心情會否緊張？佢話:「都唔係太緊張，唯一擔心係餵哺母乳，因為媽咪餵母乳時都有困難，這是媽咪家族經常出現的問題。」另外AnaR.希望可以自然分娩，佢再話:「媽咪生我時要開刀，因為韓國人盆骨較細，希望我盆骨似爸爸。」

老公得知BB係女之後，就非常興奮不停買粉紅色嘅用品，AnaR.笑指自己並非太愛粉紅色嘅人，問到老公會否不停摸佢個肚？佢話:「每朝早都會摸同傾偈，都唔知佢係同我講定同BB講。」

AnaR.希望老公陪產，萬一有任何事老公都可以立即簽紙，加上讓老公知道整個生產過程，有助一家人嘅感情關係，問到老公怕血嗎？佢笑言：「應該會有塊布遮住下身，同埋佢係坐近我個頭位置。」佢仲透露近排開始影大肚寫真，至於會否影全裸，佢就保持神秘指大家遲啲就知，而老公唔精於影相，同埋怕醜唔上鏡，所以成輯相老公都無份參與，AnaR.好期待將來拎住輯相同BB女講「當時妳喺媽咪肚入面。」