為咗解決全球暖化危機，大家越嚟越講環保，好似早兩日由美國前副總統戈爾做總旗手嘅LiveEarth演唱會，就係要全球逾20億人關注呢個問題。喺本地有200幾間分行嘅美聯集團，本着為「香港藍天」出分力，計劃將全線分行引入環保概念，首間「環保分行」噚日誕生。
呢間分行有幾環保？美聯慈善基金名譽會長林鳳芳（圖左二）話，佢哋已換晒呢間分行嘅照明系統，咪睇淨係換咗慳電膽咁濕碎，環保之餘，仲可以交少啲電費，一舉兩得。唔止咁，再加裝電子火牛減低耗電量。除此之外，分行櫥窗嘅玻璃貼上環保玻璃貼，減少陽光同熱能傳入舖內，平時開冷氣唔使開太勁，更加慳電！
美聯會向客戶送500個環保袋，當然唔係賣潮流爭崩頭嘅名牌袋，不過內有環保電筒同盆栽，等大家齊齊宣揚環保訊息，保護地球。