今日DSE放榜日，狀元中的狀元自是成為焦點，0靚模高材生、Donut成員Elise重考，考獲34分佳績，亦成為美談。但其實低分，亦不是絕路，肯肯定不是。就好似，Tommy仔阮民安咁。

傳聞當年E-kids三位成員，會考成績夾埋得5分，成員之一、人稱「樂壇小強」嘅Tommy，今日就喺旺角街頭即場rap歌，鼓勵考得唔到嘅學生，全程表現好享受自得其樂，途人眼望望，又被粉絲捕獲合照。

節錄部份歌詞先share：
「所以記住無論你今次成績係點
DSE放榜成績只不過係係七隻大字
好命嘅話你條命仲有七十幾年
所以根本無人有資格睇你唔起
踩得死你
最緊要係你自己唔好踩死你自己講完!」

咁究竟，E-kids三子盛傳會考夾埋得5分，係真唔係？Tommy話:「要問嘅，呢個問題要問嘅，唔多過5分嘛，我問你一個問題先，你覺得夾埋唔多過5分搞笑啲，定係考都冇考過得意啲？以我所知我本人攞咗1分。」

Tommy繼續拆故喇:「其實呢個江湖傳聞好耐，頭先大家聽我rap，都有加到呢句落去，每年放榜，網友話係『年經』嘛，即係每年都會講一次，其實不如我澄清，我哋3個，夾埋得1分，嗰1分，都係細佬攞嘅，冇記錯係數學。另外嗰兩位，我印象中佢哋冇參與呢個遊戲。」即係冇去應考。

對於Donut成員Elise重考DSE到34分，Tommy話：「34分非常厲害，我覺得一定要繼續讀上去。『0靚模』係名嚟啫，興趣嚟，影相靚女，讀書多條出路，你知娛樂圈唔容易混。」

問Tommy有乜嘢鼓勵考生？佢話：「考得唔好，好似我頭先rap話齋，唔覺得有人可以有資格睇唔起你，最緊要你唔好踩死你自己，好似之前自己錄嘅歌都係鼓勵自己，大家可以上網聽吓，首歌叫《踩唔死我》，最緊要自己堅強，人哋講乜唔使理，睇自己想行乜路，對自己有信心，前面好多機會。」又自sell喇……