小朋友玩泥沙可以衝出香港?堆沙堆足25年的Chris,由中一用海沙砌出人腳嚇到同學喪笑,以至組隊為傷健人士籌款,並獲邀出國與沙雕高手交流,得到更多的是友誼與自信。他力推小朋友從小學習沙雕,不單訓練手腳及啟發創意,更重要從善用大自然資源中學懂珍惜,讓下一代更愛護地球。
記者:魏嘉琳
現年41歲的香港國際沙藝協會會長沈瑞騰Chris,1989年開始沙雕創作藝術,設計超過100個作品,獲獎無數,更九度以香港代表隊身份在本地及國外參賽,堪稱本地神級沙雕大師。
原來正職是銷售員的他,玩泥沙的興趣由升中畢業旅行發掘出來,「當時暑期去長洲沙灘露營,夜晚突然喺沙堆整出一條一比一比例的人腳,由於沙係肉色,同學睇到以為係浮屍嚇親,得知真相後係咁喪笑,我先發現可以令人開心,就開始玩沙。」直至中三後獲老師力薦參加本地沙雕賽獲獎,自此便開始找尋志同道合的成員組隊以業餘身份參賽至今。
Chris指沙藝雖然是冷門興趣,但同樣可以表達社會關注的議題,甚至幫助有需要人士。他最難忘以色列於08年聖誕節攻打加沙,造成大量平民死傷,他徹夜難眠後在翌年1月舉辦沙雕藝術節為紅十字會籌款。「無人喺冬天堆沙,記得早上七點開始做,溫度只有13度,凍到手都僵,仲要籌得幾百蚊,但我哋做咗立體沙雕如一個護兒受傷的母親,一個為戰爭結束而展歡顏的兒童,表達戰爭與和平的訊息,結果反應好正面。」Chris翌年更得東華招手再辦沙藝為讀寫障礙兒童籌款,當日善款超過二百萬元,「我發覺原來沙雕唔單止係興趣,仲幫到人。」
現時他在工餘時間推廣沙藝活動,近期則獲邀今月在馬灣挪亞方舟教授小朋友堆沙,認為堆沙可從小訓練手腳協調,啟發創意,更可藉着善用幼沙,學懂循環再用大自然資源。