有冇諗過空姐微笑住問你「tea or coffee（茶或咖啡）？」結果會變成咖啡照頭淋呢？咪以為呢個係CCTVB編劇諗出嚟嘅低俗情節，泰國前總理他信嘅寶貝細女Paetongtarn Shinawatra，上個月尾搭國泰航班，由曼谷嚟香港嗰陣，就差啲跟足呢個「劇情」中伏。

呢排泰國政局又有動盪，當權嘅他信家族成員自然係主角啦。話說國泰一位泰國籍空姐唔識死，早幾日喺facebook貼咗一張有他信細女大名嘅乘客名單，唔單止留言話自己接受唔到「敵人個女」喺航班出現，仲大膽到話，如果唔係法律顧問話可能觸犯香港法律，已經用咖啡兜頭淋呢位乘客。事後嚇到他信寶貝女怕怕，話估唔到去香港做嘢兼探老竇都有錯。

肇事員工已離職

facebook威力大到美國總統奧巴馬都話驚，呢位空姐結果俾當地網民起晒底，網民仲集體喺國泰嘅facebook官方專頁投訴，怒插國泰唔尊重客人私隱，員工可以隨便公開敏感資料。國泰急急出手補鑊，結果呢位空姐嘅前途就咁「壯烈犧牲鳥」。
國泰噚日話經過全面調查，確定有空姐未經許可，私下喺社交網站發放乘客資料，希望直接向嗰位乘客道歉，仲話嗰位空姐呢刻已經唔係佢哋職員，但唔肯講係炒魷定自己走。
有泰國網民就覺得，呢位空姐雖然犯咗規，但罪不至死，覺得國泰根本係向權貴獻媚，做法「太刻薄」，揚言要罷搭國泰咁話。

mailto:[email protected]