鍾欣潼（阿嬌）上月正式與台灣「醫界王陽明」賴弘國註冊結婚同擺酒（新聞連結： https://bit.ly/2srQcU1 ），婚禮同喜宴情景，相信大家都可以喺各位賓客嘅社交平台或媒體中睇唔少，主角當然係一對新人啦，但原來，有唔少Twins嘅fans一直都喺度等緊阿嬌同好姊妹兼拍檔蔡卓妍（Sa）嘅合照，今晚，大家終於都等到。

阿嬌今晚喺Instagram貼出同阿Sa嘅合照，佢留言話：「張相仲要係我助手突然之間先記得send返畀我」，但阿嬌落咗好多tag，睇嚟句句係心聲，佢話：「#等到天荒地老」、「#其他相都仲未收到」、「#點解可以咁慢」，最搞笑嘅係阿嬌不忘同其他等相嘅人耍個冧：「#對不起各位鄉親父老」。

相信大家都有遇過，啲嘢一係唔搵，一搵到就係咁湧出嚟，之後阿嬌嘅助手再搵到另一張Sa嬌合照，阿嬌當然即刻出po，佢留言話：「我助手又記得仲有一張啦，真係唔知好嬲定好笑，不過好多謝佢。」相中阿Sa嘟長個嘴嚟錫錫新娘子，賴太，乜氣都落晒啦？

話時話，家陣數碼年代，已經唔使晒相派街坊咁費時啦，學賴太阿嬌話齋：「點解可以咁慢？」

精選娛聞，喺晒《娛果》
http://fb.com/appledailyent