當年今日
關於我們

【群情洶湧】YOSHIKI留港開騷登記混亂 亞博今早終表態

蘋果日報 2016/12/30 11:25

亞洲博覽館X JAPANYOSHIKI取消個唱

日本樂隊X JAPAN靈魂人物YOSHIKI原定噚晚喺亞洲博覽館舉行世界巡迴音樂會《YOSHIKI Classical Special with Orchestra – HONG KONG》,點知喺開騷前1小時,突然宣佈演唱會取消,其後主辦稱如常開騷,不過結果YOSHIKI宣佈因技術上問題及牌照問題,取消個唱兼兩度鞠躬道歉。
其後喺凌晨12時左右,YOSHIKI再於twitter出po,交代事件經過,佢仲話今晚喺場地免費演奏私人表演,所有門票都將獲得退款。跟住主辦機構亦喺fb宣佈有關詳情,安排如下:
原持有12月29日「YOSHIKI CLASSICAL SPECIAL WITH ORCHESTRA」演唱會門票之人士可於12月30日下午4時至8時於亞洲國際博覽館3號展覽館憑完整有效門票進行登記,並領取「邀請卡」,每張有效門票可領取一張「邀請卡」。而每位持票人士可邀請一位朋友領取一張額外邀請咭(該隨行朋友須同時登記)。
為表歉意,主辦機構現另備限量邀請卡予支持YOSHIKI 之歌迷,如有興趣,可於2016 年12月30日10:00am開始到 https://goo.gl/Pa9Mzr 登記,數量有限,先到先得。成功登記人士,將於2016 年12月30日2:00 pm 前收到個別電郵確認,憑電郵可於上述時間(下午4時至8時)於3號展覽館進行登記及領取邀請卡。
有關退票之安排及詳情,將盡快於快達票之網頁公佈。為造成之不便,深感抱歉,懇請見諒!
不過就算安排再開騷,唔係個個fans都可以去到,所以有人喺fb留言炮轟話:「多謝YOSHIKI肯做一個咁嘅安排。但我30號晚要開工,就算想請假,咁短時間根本請唔到。所以拜你所賜,我由有得睇變冇得睇。能夠搞event搞到好似你咁,真係人如其名,好不凡呀。」
「所謂嘅“限量邀請卡”係for本身無買飛嘅人?講穿咗就係將買咗飛但係俾你哋搞到來唔到嘅人嘅位俾咗呢班本來無買飛嘅人啦係咪?咁對本身有買飛嘅人公平咩?雖然話就算有買飛都會refund,但有買飛嘅人先至係今次事件受影響嘅人啊!係咪應該補償咗呢班人先?即係你俾咗千幾2千蚊買咗張飛,搞完一場大龍鳯終於入到去睇,然後你隔籬甚至你前面嘅人答你:我無買飛架,見有得免費睇咪登記囉~」
至於舉行場地亞洲博覽館方面,今日早上亦有最新聲明:「本館得悉並了解主辦單位及演出者,計劃今晚 (12月30日) 舉辦私人音樂活動。作為場地提供者,亞博館就事件積極與主辦單位溝通及配合安排,強調及要求主辦單位就所有活動須符合相關法例規定,以確保活動順利舉行。」