當年今日
關於我們

【粉絲全程追星】SM夏威夷之旅 過氣情侶泰妍 伯賢同行

蘋果日報 2016/08/30 14:00

SM伯賢泰妍夏威夷少女時代

擁有韓國唔少當紅團隊Super Junior、EXO、少女時代等嘅SM事務所,為咗慶祝公司成立20周年,就特別安排藝人及工作人員約350人,於前日起程出發到夏威夷玩5日3夜,當中大部份成員都獲公司安排假期一齊去玩,不過少時成員Tiffany因為早前喺韓國光復節,誤貼日本國旗嘅Emoji而惹起韓國網民不滿,所以有指Tiffany要為事件反省而冇得去今次旅行。
雖然今次難得咁多位SM藝人一齊去旅行,但係佢哋行程都唔係想像中咁happy,因為佢哋由落機開始,基本上就去到邊就被粉絲跟到邊,而唔少粉絲仲喺酒店外等偶像,又全程跟拍,成功拍得偶像嘅粉絲就開心喺網上公開照片同其他粉絲分享,但其他粉絲就戥偶像慘,事關佢哋連放假都要被粉絲貼身追訪,覺得粉絲應該要尊重偶像,等佢哋可以喺私人時間好好玩樂。
另外,今次旅行,同行仲有過氣情侶泰妍同伯賢,至於現時甜蜜拍拖嘅Krystal同Kai,就唔見佢哋嘅相片,唔知佢哋到底有冇去。