唔少飲食股正在排隊上市，就連經營米芝蓮二星「都爹利會館」嘅佳民集團，近日都向聯交所遞交創業板上市申請。佳民有幾位富二、三代股東，包括金山工業（040）老闆羅仲榮新抱黃佩茵、新世界發展（017）主席鄭家純女婿龐建貽、中港照相（1123）太子爺孫道弘，堪稱一隻富貴飲食股。
都爹利會館喺中環相當出名，好多賓架或企業高層光顧，除咗食物質素唔錯，最特別係佢同藝術掛鈎，不時舉行各類型藝術展覽，舉例，2013年內地藝術家艾未未就曾經擔任一個展覽嘅策展人。

佳民港擁8餐廳

正申請喺創業板上市嘅佳民，在港經營8間餐廳，第一間208 Duecento Otto喺2010年開業，另有一間新加坡餐廳。公司初步招股書寫明，餐廳主要針對中到高消費客戶，尤其係外籍人士。
收費貴唔等於利潤豐厚，佳民舊年收入1.7億元，但員工、材料、租金等成本相當重皮，盈利只有430萬元，今年首7個月更加要蝕125萬元。
不過，一班富二、三代夾份投資做高級餐廳，未必將賺大錢放喺首位，最緊要係每間餐廳各具特色兼且受歡迎，需知道成功嘅定義，各有不同。
佳民大股東兼主席係羅仲榮新抱黃佩茵，佢今年36歲，來自新加坡，本身在港有間J Plus精品酒店。
雖然黃佩茵同老公羅揚傑一齊搞餐廳生意，但羅揚傑並非佳民董事。其他股東就包括龐建貽、孫道弘、開私募基金嘅諸承譽等，但初步招股書未披露確實持股量。

李華華
mailto:[email protected]