攀登世界最高峯是所有攀山愛好者的夢想，去年，年過半百的鍾建民四敗四戰，終達成堅守了11年的目標，成功攀登珠穆朗瑪峯。初以為毅力就是他的成功因素，但原來「行唔到要認命，識得以退為進」才是他的座右銘，這話出自具30多年攀山經驗的鍾建民，一定信得過。

記者：尹珊珊
攝影：陳智良
（部份圖片由被訪者提供）

小檔案
鍾建民，51歲，具30多年攀山經驗，乃香港首位、中國第三位攀越全球7大洲最高峯的攀山專家，共征服世界各地超過20個極峯，亦曾徒步至北極點，現為香港攀山總會義務顧問、香港攀山訓練中心創辦人。

11年登峯生涯

1.1982年，北美洲6,195米高的麥肯尼峯。
2.1985年，非洲5,895米高的馬扎羅山峯。
3.1997年，歐洲5,642米高的埃拔爾峯。
4.1997年，南極洲4,897米高的文森峯。
5.1998年，南美洲6,962米高的阿貢加華峯。
6.1999年，大洋洲4,884米高的古士坦峯。
7.003年，亞洲8,848米高的珠穆朗瑪峯。

學攀石無師自通

依約到達鍾建民（鍾Sir）經營的攀山用品店採訪，只見他行色匆匆，原來剛從飛鵝山急趕回來，「𠵱家我一星期會抽三四日跑山，唔係話要好Fit，但一定要Keep到體能，鍛煉心肺。」早在16歲，他已開始跟隨旅行隊行山，73年首次接觸攀石，「喺我嗰個年代，攀石重係新鮮玩意，無人教，又無互聯網，我無師自通嘅！」76年，他往比利時就讀法文及平面設計課程，四處闖蕩，「嗰時成日去圖書館睇關於爬雪山嘅書，覺得好過癮，但又好似係好遙遠嘅事，但原來只要有信心，都唔係話無可能。」
在歐洲生活的七八年間，他上過法國阿爾卑斯山、白朗峯、瑞士的麥達尼峯等，「攀白朗峯係重要一課，因為白朗峯容易雪崩、氣候變化大，令我增進唔少經驗。」85年他回港發展，「同香港脫晒節，做過一排電腦銷售員，最後決定開設攀山訓練中心，捱幾個月，發覺單教攀山搵唔到食，於是就喺上海街開咗間幾百呎閣樓舖，賣攀山、攀石器材兼開辦攀石課程。」店子迄今愈做愈具規模，由一間變四間，代理不少外國攀山用品，業務非常忙碌。

勇闖珠峯四戰四敗

鍾Sir坦言征服珠穆朗瑪峯感受最深，「唔係因為珠峯係世界第一高峯，而喺之前失敗過四次，好唔甘心。」11年前，他曾偕同香港另一攀山專家湛易佳，首次試登珠峯，湛成功登頂，但他走至6,000多米時便因高山症、體力不支折返，「當年豪情壯志，一心諗住完成七大洲最後一個高峯，失敗後成個人謝晒，之後5年都唔敢再試。」99年起，鍾Sir再次戰珠峯，但不幸地接着的三次也因種種原因而失敗，至去年5月，他苦守11年的目標終於達成，成為香港首位、中國第三位攀越全球7大高峯的攀山專家。
以為千辛萬苦上到最高點，理應興奮得雙手撐腰仰天長嘯，鍾Sir笑着解釋：「攀到頂峯唔表示完成整個過程，其實落山先最艱難亦最容易生意外，因為心情興奮會鬆懈，體力又幾乎消耗盡。」登頂一刻，他只作短暫停留、拍照片、喝一口水，便要再次面對下山的挑戰，「最享受係回味嗰一刻，有時睇番啲相，諗返起個過程，真係好開心。」

人氣急升鼓勵港人

凱旋回港，鍾Sir人氣急升，一下子紅起來，電子傳媒、文字媒體的專訪多至數十個，學校、團體爭相邀請出席講座，更與歌手陳慧琳等出席宣傳香港的活動勉勵港人信心，甚至連早前長洲太平清醮搶包山活動應否復辦，他也應邀成為視察隊成員，但一切一切未令他感到飄飄然，「其實唔係想像中咁多迴響，剛剛返嚟嗰個月就有人記得我，之後咪又係做番自己？」他曾到過三四十間學校、男童院甚至保險公司演講，憑自己的經驗鼓勵人不要輕易放棄，勇於面對挑戰，「其實話題都係以勵志性為主，唔好講到話培育下一代咁偉大，只係想幫社會做番少少嘢。」

個性穩陣量力而行

回想五度攀登珠峯，鍾Sir從中啟發不少，「第一次失敗好唔開心，但諗番轉頭，第五次嘅成功係之前四次加加埋埋嘅失敗經驗累積而成，所以失敗唔代表唔得，氣餒先係唔得。」攀山始終有危險，鍾Sir亦直言經常會面對死亡，「攀珠峯，成日面對有人死、有人傷，好唔開心，試過見到其他登山者的屍首，無人理，由得佢畀禿鷹食，自己認識爬珠峯嘅朋友當中，有十個死咗，有時都唔敢同太太講。」其實早在1981年，他首度攀登北美洲的麥肯尼峯亦冰傷了耳朵，嚴重到差點要切除，「好彩最後都醫得番，攀山真係要注重安全。」
量力而行，一向都是鍾Sir攀山的座右銘，「自己知能力、極限去到邊，我做事不嬲穩陣，做生意係咁，攀山都係，我有家庭，有大好生活，無理由玩命啫！好喇，畀你上到頂，但落唔到山，咪一樣享受唔到成果，咁有咩意義呢！」他以登珠峯做例子，「爬珠峯好睇緣份，少少事都足以影響成敗，雪山上面無人救你，行唔到就行唔到，唔係話有毅力就得，要識以退為進，爬唔到咪認命囉！」鍾Sir更寄語其他攀山者，要清楚知道自己能力極限，「唔好盲目咁一味死衝，今次上唔到，咪留番下次囉，起碼可以安全返屋企。」

未來計劃接踵而來

爬山是很個人化的活動，動輒需時一兩個月才能登峯，他自言經常會想家，惦掛家人，幸好老父和太太也很體諒他，「我比一般人幸運，爸爸好開通，細細個已經帶我四處行山，太太係以前玩攀石時認識嘅，佢本身係體育教師，玩開運動，所以我無太多掣肘。」鍾Sir現時育有兩女，閒時，他會帶着家人行山、露營，飛鵝山、獅子山等山嶺也留有他們的足迹。
世界七大洲第一高峯統統征服，這似乎已挑戰了所有極限，「好多人問我，爬晒七大峯係咪無晒目標呢？但我覺得珠峯也不過係其中一座山，上過珠峯唔代表永遠唔再爬山，呢個世界重有好多山，爬矮山一樣有樂趣。」

未來，他靜極思動，心目中已有數個計劃，包括再來一次北極之旅，花三四十日由格陵蘭南部走到北部，也想選個較輕鬆的旅程，陪家人到外地走走，正在進行中的，是着手撰寫一本有關攀珠峯的書籍，「我希望將之前攀珠峯嘅經驗寫成書，𠵱家接近完成階段，預計過兩三個月後會出版。」見報今日，鍾Sir正遠赴四川四姑娘山，義務為香港攀山總會考核冬冰雪教練。「其實早幾個月前已經去過，但主要是幫總會睇營地，今次會同教練同學員一齊飛過去，希望是可以Setup一個完善的制度，訓練到一批冰雪教練，之後再開班教學。」可以想像，未來一年鍾Sir仍會在忙碌中度過。