青年人向上流難，要上樓更難，積聚咗唔少對政府嘅不滿。林鄭政府上場後一直話要搞好同青年人關係，為咗顯示做緊嘢，會將青年事務委員會升格做「青年發展委員會」，由政務司司長張建宗擔大旗做主席。民政事務局同青年事務委員會今晚搞第二場「青年發展政策公眾交流會」，臨時有位「特別嘉賓」登場—Matthew，張建宗。

Matthew話自己只係參加者，叫大家唔好叫佢做司長，呢晚係聽下青年人對政府有咩期望、不滿同訴求，又話今屆政府要做到六個多，「多關心、多聆聽、多行動、多創新、多互動、多協作」，認為而家香港人口老化，勞動力下降，所以青年人「一個都不能少」！

一打呔就興奮嘅Matthew呢晚除埋呔同年輕人分組討論，仲好認真咁抄筆記，查實佢今日中午都視察咗1823中心，感謝中心人員處理香港學生攞英國留學簽證求助個案時嘅努力。

青年事務委員會主席劉鳴煒就話，之前已經行勻各區，出席咗559次同類活動聽意見，之前都擔心聽埋咁多意見但發揮唔到，而家Matthew親自督師，跨部門處理，相信青年嘅聲音可以變成政策藍圖。