入行超過30年嘅姜皓文(黑仔)，今年憑《樹大招風》「大輝」一角首次獲提名金像獎最佳男配角，日前黑仔接受梁泰來嘅《1圈圈 星光背後》訪問，重提98年因為陳明君(原名陳梅馨)做第三者，介入黑仔同老婆金慧英嘅關係。

當時姜皓文接受《今日睇真D》訪問期間，仲強調已與金慧英分手，更揚言錯在只係佢仍居於金慧英家中，又宣稱陳明君仍是其心中至愛，佢會盡力去挽救呢段情、對佢更好云云；點知翌年年頭又被拍到上金慧英屋企，男方聲稱係「通坑渠」；更可笑係未幾又被拍到與好番再鬧分手嘅陳明君幽會撐枱腳，並雙雙拖手仔赴愛巢共度良宵……。更傳奇係，99年10月，黑仔與金慧英結婚。

黑仔在節目中談到當年呢段三角戀，因為自已嘅年少無知，登上娛樂版C1頭條，承認係自己當年過失，深感內疚，佢話﹕「當年唔識得珍惜，錯晒，我係不能獲原諒嘅！」

好彩太太金慧英最後都原諒咗黑仔，黑仔話依家學懂珍惜眼前人，兩人結婚逾17年，仍舊恩愛。

金慧英其實係94年亞姐，但婚後已淡出娛樂圈，黑仔話同老婆有共識，唔想佢太辛苦：「我都係幕前人，真係唔忍心佢要面對娛樂圈啲唔開心，我唔想佢接觸，希望我仲有能力養佢嘅時候，盡力照顧佢。」黑仔話同老婆冇計劃生小朋友，寧願將時間照顧小動物。

對於有人覺得黑仔現在先被提名金像獎，好似係太遲，黑仔笑言網民仲緊張過佢，佢話﹕「我又唔覺遲，未有提名係因為真係未準備好，網民嘅口味真係好難觸摸！」

但得知獲提名一刻，黑仔話真係開心到同太太開香檳慶祝：「我都恨攞獎㗎，不過我都好欣賞同獲提名嘅演員，尤其喜歡曾志偉同吳孟達。達哥我由電視劇《新紮師兄》嘅年代已經好喜歡佢，佢又經常提點後輩，私底大家都好熟；志偉更加係恩師，帶我出身做喜劇，當時因為我皮膚黑，揀咗我做《開心主流派》。」