喺外國旅行先發現，冇乜人好似香港人咁鍾意隨街食嘢，仲要係一路行一路食嗰種。同迪士尼樂園餐飲營運總監陳德禮傾開，佢喺香港迪士尼都加入港人掃街特色，五年前開園時按照外國經驗，估計約12%賓客會幫襯小食亭，點知估錯，有成40%至50%人會買啲熱狗、爆谷、魚蛋咁，邊行邊食，部份人仲當正餐㖭。
樂園五周年嚟緊，佢都諗緊好多新食物，會喺20幾個小食亭同車仔加新意思，頭炮10月萬聖節推出雞蛋仔，唔係街邊嗰啲，係迪士尼人物造型，當然唔少得米奇頭㖭。味道仲有朱古力味，甚至wasabi味。小妹擔心雞蛋仔整得太可愛，唔捨得吞佢落肚。

卡通點心好神似

佢又話香港人鍾意周街「拮拮吓」，會推「串串芝士蛋糕」，將細細件芝士蛋糕，好似魚蛋咁串起，方便一邊等玩一邊嘆。好似啱啱推出卡通點心，包括叉燒豬仔包、米奇煎薄餅、米奇鴛鴦糕、三眼仔菜肉包、雞丁蓮蓉包等，整得幾神似，賣出咗四萬件。最近多咗印度客，園內有印度籍廚師炮製嘅咖啡，遲啲有會Tandoori印度烤雞㖭，部份餐廳就主力賣素菜。
陳德禮透露，擴建嘅反斗奇兵大本營，將會有專為小朋友而設嘅健康食品；迷離莊園亦會有一間有400個座位嘅主題餐廳。據講，9月5日迪士尼會邀請一班業界、新聞界預祝9月12日五周年，之後會有唔少新節目，除咗萬聖節，迪士尼雪亮聖誕都會有新嘢，而慶祝活動仲會延續到整個2011年㖭。
電郵：mailto:[email protected]