【韓流】到底有冇咀? 朴敘俊朴敏英雙唇有所接觸
朴敏英李泰煥朴敘俊韓劇金秘書為何那樣
等咗成個星期,劇迷唔睇世界盃都一定追睇由韓國男星朴敘俊跟女星朴敏英合作嘅tvN人氣韓劇《金秘書為何那樣》,噚晚《金秘書》播出第五集,承接上集朴敏英意外撲到倒朴敘俊懷中,朴敘俊就即緊緊攬實女方,並表白:「就咁樣一陣,我依家想愛你,試下去愛你。」令朴敏英好驚訝,朴敘俊覺得尷尬,急急解釋話:「我以後打算去愛你,係你嗰本幼稚嘅書上面咁寫。」
朴敘俊一早去朴敏英屋企等佢,因為朴敏英匆匆出門,所以一頭就衝咗去朴敘俊嘅懷裡,並親自車朴敏英返工,原本想讚朴敏英靚,點知又講唔出口。
朴敘俊決定向朴敏英正正經經咁表白,並特別安排餐廳,朴敏英打扮到靚一靚赴會,點知就喺餐廳門口遇到朴敘俊嘅哥哥李泰煥,即時令朴敘俊眼火爆拉住朴敏英走人,令朴敏英大感莫名奇妙,兩人不歡而散。
而朴敏英因為仲嬲緊朴敘俊,令到朴敘俊好想快啲結束呢種尷尬局面,於是決心向朴敏英道歉,由於朴敏英第一次見朴敘俊道歉,所以兩人好快冇事。
喺公司兩人氣氛好曖昧,朴敘俊突然好進擊話要令到朴敏英動搖,之後個頭越來越貼近朴敏英,仲直接咀朴敏英,當雙唇接觸之際,朴敘俊被突然嘅聲音嚇一嚇,即時唔小心推開咗朴敏英,搞到朴敏英嬲爆走人。
下集預告,朴敏英好似認出朴敘俊就係兒時幫過自己嘅哥哥。而噚晚到底「雙朴」有冇咀到就成為劇迷討論嘅對象,因為雙唇接觸鏡頭只係一瞬間,所以劇迷都懷疑自己睇錯,不過有睇過原著漫畫嘅劇迷就確認兩人有咀嘴,因為漫畫中金秘書有指那個係佢初吻,由於有咀戲,刺激噚晚一集收視升至6.855%。
更多韓流,喺晒《娛果》
http://fb.com/appledailyent