國際小姐澳門代表嘅麥嘉欣（Sofia Paiva）同香港代表王詠珩（Wing）今日喺《蘋果》娛樂直播《今日ENT》現身，問到歷屆港姐，佢哋覺得邊個最靚？麥嘉欣話：「好多都靚喎，近期我鍾意Grace(陳凱琳)。(咁鍾唔鍾意埋鄭嘉穎？)唔會，留畀佢鍾意。」王詠珩比較留意麥明詩：「麥明詩好有氣質，尤其聽完佢講嘢更欣賞。」麥嘉欣都欣賞麥明詩：「有睇麥明詩嘅報道，講嘢好得體。李嘉欣都好靚，同我一樣叫嘉欣，至今都好靚好得體。」

講到好多網民見完今屆港姐三甲之後，即刻大讚國際小姐澳門代表嘅麥嘉欣同香港代表王詠珩好靚?麥嘉欣話：「我今日有化妝師，衫同手飾都有贊助。多謝，為澳爭光？希望能為澳門爭光啦。」咁覺得澳門有乜同唔好？麥嘉欣覺得澳門出名係嘢食、人情味同有特別地方，比較唔好就係太細：「我希望多啲唔同方面發展，因為太多賭場，我哋未夠21歲唔啱，希望開多啲唔同樂園。」

咁點解參加國際小姐，唔參加港姐？王詠珩認為國際小姐可以接觸唔同culture嘅人，唔係港姐學唔到，係希望同多啲唔同嘅人交流，我覺得香港較international，我都去過英國讀書。」

網民讚佢哋笑容靚，有冇箍過牙，麥嘉欣話冇，而王詠珩直認箍過牙。