全球剛經歷了驚心動魄的兩周，投資者恍如重回大時代，直至最近幾日歐洲多國出招禁止沽空，形勢才似乎稍為回穩。由於沽空者獲利已巨，加上亦對政府隨時出招救市心存顧忌，因此禁止沽空令部份實力不算太大的淡友先行平倉，以致外圍股市略有反彈，不過此招是否足以扭轉形勢，其實市場都好懷疑。
記得2008年美國亦曾率先帶頭禁止沽空，當時雖短暫穩住陣腳，但未幾股市又跌過，皆因投資者要造淡可以透過期貨，同時當大家對風險資產無興趣，就算有無禁沽空都一樣會掉晒啲貨，因此長遠來看，此招根本無甚作用，反令人憂慮歐洲形勢是否如2008年美國般惡劣，因而需要動用此招。
當伯南克說低息環境好大機會維持至2013年年中，其實大家都明白外圍經濟環境有幾差，中國面對滯脹問題，上周公佈的7月CPI又破頂，與之前市場對內地通脹上半年見頂的預期出現落差，如果唔係盛傳國家隊入市，令A股成為了維和部隊，港股表現或會更差。
現階段似乎沒有看好的理由，不過，在多方政府出手維穩下，短期市況應可好番少少，但仍是反彈可以，長揸免問之局，博反彈的時機如之前所說，見三點後歐洲能帶動港股上升才好出手。