今年諾貝爾文學獎爆冷由75歲嘅「搖滾民歌之父」卜戴倫（Bob Dylan）奪得，不過大會喺本月13日公佈呢個消息之後，卜戴倫方面冇任何回應，連諾貝爾委員會秘書都話搵佢唔到，電話電郵都試過晒，搞到大會話放棄唔搵佢，有委員仲話卜戴倫好無禮貌。

等咗兩個星期，卜戴倫仲於有回應喇！諾貝爾委員會發聲明，指卜戴倫主動打電話畀諾貝爾委員會秘書Sara Danius，喺電話中卜戴倫話：「獲得諾貝爾獎呢個消息令到我講唔到嘢，我覺得太榮幸。」不過委員會就冇表示卜戴倫會唔會出席12月嘅頒獎禮。

而英國報章《每日電訊報》就同卜戴倫做咗訪問，問佢到底會唔會去領獎？卜戴倫話計劃緊出席：「當然，如果得嘅話。」對於得獎，卜戴倫表示：「都幾難以置信，很美妙，發夢都估唔到會拎呢個獎。」記者又問佢點解唔接諾貝爾委員會電話？正於奧克拉荷馬州開騷嘅佢笑言：「我咪喺度囉！」