亨利喺阿仙奴對巴塞隆拿嘅歐聯16強首回會比賽前夕，同巴塞三位球星美斯、蘇亞雷斯同尼馬合照引起一番爭議，唔少「廠」迷都玻璃心，認為亨利同「MSN」合照係撐巴塞，話佢係反骨仔。其實亨利雖然係阿仙奴名宿，但踢過嘅球隊唔止一隊，而佢2007年離開兵工廠，正正就係去咗巴塞隆拿，所以搵巴塞球員合照其實冇乜大不了。好似有網民話齋，佢件衫心口大大隻PUMA（阿仙奴球衣贊助），擺明係「身在曹營心在漢」，有人更講到佢係去收料，之後再放畀雲格㖭！話時話，亨利效力阿仙奴期間，佢哋喺2006年歐聯決賽正正係輸咗畀巴塞，至於今次兩隊喺16強對壘邊隊可以晉級，就要拭目以待喇。

體蘋果facebook專頁↓↓↓
http://fb.com/appledailysports