原名姜永明的資深演員江漢，日前於療養院病逝，享年78歲。今日其子姜向暉接受《蘋果》獨家訪問，提到父親生前的點滴。

2008年，江漢為了兒子姜向暉幾乎墮下電話黨騙局破財20萬元。(相關新聞﹕ http://bit.ly/2khDW4j )姜向暉表示：「係電話騙案，當時應該係唔畀佢收線，屋企電話都唔畀收線，所以佢冇辦法聯絡我，法庭口供都講咗係隨機打咗佢號碼，佢對所有親人、朋友都係兩脅插刀！」

古天樂和李珊珊跟江漢叔合作拍攝《烈火雄心》時，均大讚江漢叔好人，姜向暉透露與爸爸食飯時都會閒話家常，聽過他談拍劇的事，他說：「我都聽阿爸有提過，話古天樂、王喜、宣萱、李珊珊都係好有禮貌、好勤力嘅人，同埋佢哋好尊重長輩！我聽佢講過，拍《烈火雄心》時，佢好欣賞鄭敬基唱個首《兩脅插刀》（插曲），佢話拍劇同睇劇本之後，再聽鄭敬基唱得咁好，佢好鍾意。」

姜向暉是足球員出身，原來江漢叔都好鍾意踢波，以前有跟操踼波，他說：「佢以前60、70年代都跟過愉園會一齊操練！我啲前輩都跟我講過我阿爸一齊操練，我諗可能係要拍有關於足球員，所以跟操。」不過，姜向暉表示自己踢足球時，江漢叔已很少落場看他踼波，只是間中看電視直播賽事。而姜向暉當然亦都有捧爸爸場，看他演過的戲，問最深刻是哪一部？姜向暉說：「我細個睇麗的時期老竇同陳觀泰拍嗰套《人在江湖》，首插曲《人在旅途灑淚時》又好好聽。」