華置（127）大股東劉鑾雄（大劉）個仔劉鳴煒曾經因為擔任公司執行主席，年薪超過1,400萬元，喺上市公司富二、三代當中算係數一數二，但隨住佢2015年底辭任行政總裁兼轉做非執行主席，話明係非執行，工作量自然大減，人工亦要跟住大幅調整，結果佢舊年全年只袋30萬元袍金。不過，大劉上月分身家後，劉鳴煒揸住華置近25%股權，係有股息分嘅，人工都只係意思意思。
市場原以為劉鳴煒一定接棒打理華置，點知佢好似鍾意處理本港青年事務多啲。佢2006年開始做華置董事，2014年升做主席，兩年唔夠就轉做非執行主席，早前大劉接受訪問時，被問到想唔想阿仔做未來接班人，佢都話唔知道阿仔有冇興趣。