環保和可持續的議題，近年成為全球時尚大趨勢。香港著名設計師何志恩（Johanna Ho）幾年前忽然環保醒覺，想像兩個女兒的未來世界，毅然決定結束個人品牌，今年跑到深水埗開拓新的時裝平台，聘請本地車衣女工及年輕人，以自身經驗重燃本土時尚的小火種，「唔係要拯救世界，係諗點去幫呢一代，點樣可以炫耀返香港！」
撰文：梁錦雯　
攝影：陳慧安

何志恩在英國時裝學府Central Saint Martins畢業，一出道即獲日本公司注資，在當地甲級地段連開11間自己名字的時裝店，成為千禧世代揚名亞洲的香港時裝設計師。這天她着上印有YOUTH字樣的衞衣、波鞋，穿梭貧窮人口雲集的舊區深水埗，最後停在一間綠色懷舊旋轉樓梯的打卡熱點咖啡店門前，開心講解自己新的快樂現況。

原來這間樓高三層的舊建築物，是Johanna近年轉營的總部，地下是其創立的時裝平台PHVLO HATCH與本地咖啡店Colour Brown聯乘店，二樓及三樓是她的工作坊及文化項目的展覽場地，她細說可以用「快樂美滿」、「可以死得」來形容在日本的階段。2011年基地搬回香港，不過幾年前和日本同事閒談時令她時裝「覺醒」，「佢哋話啲賣唔去嘅衫，會送焚化爐，咁我咪好似變咗『殺人兇手』咁，呢吓令我有所改變，加上自己有兩個女，就決定向環保方面睇。」

Johanna毅然結束自家時裝品牌，告別一年六季衫的急速節奏，「個節奏係唞唔到氣，又喺度燒緊銀紙，又燒緊衫，好唔對路。」她之後返回英國母校取經，先辦以環保物料為素材的時裝比賽，再為獲獎的西班牙組合配對投產賣去連卡佛，加強她轉營到一站式時裝品牌平台業務的信心，「我成日想將西方同香港串埋一齊，我喺香港出世外國大，但我有一個心想點樣幫返香港，同炫耀返香港。香港𠵱家遺失嘅係競爭力，我哋團隊係老練，有70幾歲老師傅、有designer、用我哋經驗帶返的競爭力。𠵱家年輕人畫圖案就掟去深圳生產，但件事點做？個袖點做已經係lost in translation，所以我哋有自己一個辦房，自己亦可以係以一個designer同對市場有經驗嘅人同人交流，攞個平衡，有少少湊仔，有少少做埋agent。」

選擇深水埗為工作基地，區內有不少時裝布料及原材料店，對Johanna及外國時裝人而言是Aladdin's cave，她遂以「香港故事」為出發點，以自己的專長為該區的基層出一點力，如聘請失業的車衣女工，「佢哋以前喺香港嘅廠房已經閂咗，好多冇咗份工，流失咗一技之長冇得用，亦會搵啲青少年做學徒，佢哋嚟自基層，或者對呢個社會脫咗節或迷失方向，畀個機會佢哋嚟實習，好似一個訓練營。」

去年Johanna與孤兒院合作開班教做環保時裝，對象是一班11至16歲的青少年，她找曾合作的品牌取一批舊衫教學員做剪裁，也計劃疫情過後搞裁剪班，「我個人好樂觀，危機危機，即係機會，用住slow down時間去籌備，去迎接新社會來臨。」

「英國文化對環保嘅了解係好深入。」何志恩在英國讀時裝，師姐Stella McCartney致力於環保永續的時尚精神，同樣是女設計師、同樣畢業於聖馬丁，兩人的更大共通點是媽媽身份，「𠵱家小朋友太幸福喇，好多嘢好易得到手，我一個女11歲、一個女13歲，兩個都幾creative，我都會響日常生活中，教育佢哋，好似搵一嘅環保物料，好似廁紙筒、紙箱，用嚟砌飛機模型，既係手作玩具，又可以建立親子關係。其實，呢樣嘢我哋小時候都有，細個時，媽咪都會搵啲唔要嘅布，放啲米入去，做成豆袋、抓子，或者用舊毛冷、舊公仔，呢啲小工藝玩具已經越來越少。」

更多精采時尚內容，盡在 http://add.appledaily.com。