【熱血點五步】林耀聲在電影《點五步》擔正飾演為夢想而奮鬥的屋邨仔，其滄桑又帶點憂鬱的眼神，演活時下年輕人苦無出路的坎坷。阿聲這份「梁朝偉」憂鬱，是裝不出來的，卻是他的人生歷練。08年，他在麥曦茵電影《烈日當空》亮相，是其中一位男主角，之後演出機會不多，收入不穩。為生存只能靠打散工過活，他日前接受本報訪問時憶述說：「做過跟車、文職、廚房、侍應、貨倉、裝修、地盤、冷氣、磨雲石、壽司學徒、髮型學徒，都有二、三十份散工。Keep住一個行屍走肉嘅狀態去追夢。」

「想試吓做奸角」

面對朋輩冷言、家人憂心，戶口試過僅餘幾仙，他都有一刻動搖：「我試過最差係有一個禮拜，每日只可以用四蚊去買塊光酥餅食，做我三餐。嗰段時間係好想放棄，咁辛苦為乜嘢呢？」阿聲終於遇到《點五步》，雖未至於一炮而紅，但也多了人認識。他說：「係會多人識咗，都開心嘅。嚟緊想拍乜嘢戲？唔係我想喎，係導演。不過我想試吓做奸角，因為啲人話我個樣太正氣。」那麼女友張沛樂（沙律）可有支持？阿聲羞紅了臉說：「女朋友？有，有支持。」這一代年輕演員機會不多，政府可有提供足夠支持？阿聲說：「其實我覺得係好唔support，因為啲錢都唔知使晒去邊！我覺得政府要多啲聽吓年輕人嘅說話。」
採訪：馮國康、黃芷蔚
攝影：馮峰、吉吉
服裝提供：Boys Next Door