新一屆全國政協港區委員，似乎都有唔少女將上榜。繼民建聯主席李慧琼或獲任全國政協委員，八方之前亦預告，工聯會會長林淑儀料由全國政協升呢至常委後，《now新聞台》引述消息話，前世衞總幹事陳馮富珍都榜上有名，而且唔只委員咁簡單，仲要係新一屆常委熱門人選，據聞年屆70嘅佢好獲阿爺重視，有此厚職亦唔出奇。

而近年無論係港區人大抑或政協委員，不時見到前問責官員嘅身影，消息話梁班子時代兩名局長包括高永文同黎楝國，同樣會喺名單之上，估唔到唔只做完特首可以做政協副主席，原來做完局長都係政協委員搶手貨。

至於其他備受重視嘅政商界猛人有冇得留任，尤其係八方早前已經金晴火眼昅實嘅董建華去留問題......全國政協常委會聽日開會審議名單，聽日之後料有分曉。