噚晚除咗喺歐聯主賽圈抽籤之外，亦喺頒發歐洲足協獎項嘅日子，唔少球星都畀面出席。而皇家馬德里後衛沙治奧拉莫斯，同埋利物浦翼鋒穆罕默德沙拿呢對仇家，自上年歐聯決賽之後，再喺頒獎禮入面聚頭。沙治奧拉莫斯仲要再次吼住沙拿隻手，究竟係發生咩事呢？

話說沙治奧拉莫斯喺頒獎禮就正正坐喺穆罕默德沙拿後面，而當拉莫斯上台拎完最佳後衛落台，佢拍咗一拍沙拿嘅左邊膊頭一下，可能係想同佢握下手咁。點知沙拿就一於少理，當佢透明，由始至終都無望過佢一眼，搞到拉莫斯都即刻同返坐自己隔離嘅隊友基羅拿華斯，仲有莫迪歷握手就算，尷尬非常。

雙方嘅牙齒印喺上季歐聯決賽而起，拉莫斯除咗整傷咗沙拿之外，仲撞到門將卡列奧斯腦震盪，事後仲要表示自己無為呢啲事而受良心責備，瞓得不知幾好。當沙拿見到你上台拎最佳後衛，自然就勾起呢一幕幕畫面，仲邊有心情同你扮friend至得架？

--------------------
意大利藍戰士駕到BFB CHAMPIONS 2.0！登入即送★7[Ex]尼斯達'07！立即下載
http://bit.ly/2xrTKGM
--------------------
《體蘋果》陪你睇波講波
https://www.fb.com/appledailysports