參與「清旺」的靈魂人物光頭周，在佔旺開始時，以「綠色和諧大聯盟」身份異軍突起，經常到佔領區挑釁集會人士，又出錢帶隊圍堵蘋果大樓。這位被指擔當「江湖清場令」的督師，隨旺角清場後消聲匿跡，一年後涉嫌勒索被捕，搵工處處碰壁，最後只能當廚房學徒，境況落泊，日前身穿工人服和水鞋接受訪問，霸氣盡失。

光頭周原名周念慈，在佔領期間，出盡風頭，受訪時經過旺角彌敦道，路障帳篷不復在，看到旺角車水馬龍，大嘆「咁咪幾好囉！」然而，回望過去表現，他以一個「輸」字總結自己表現，「輸係我輸，輸係因為(反佔中人士)唔可以豁達，唔可以包容佔中的人。」

一年前，他帶隊包圍蘋果大樓，被問及資金來源時激動說︰「個個都話我收錢，但我係冇嘅，其他人有冇我係唔知。」他稱「圍蘋」不是挑釁，形容自己「角色類似一個公關，好有禮貌」，指當時捱眼訓到現場，是想就反佔中人士與報道的誤會作溝通，「希望搵解決方法」。

他指「清旺」令他失去原本的保安工作，轉工幾次才找到長工。對於被人指為爛頭卒，他說從未後悔︰「係我學識唔夠，經驗唔好，如果考試唔合格會否『賴』老師？」

想睇最新消息？　即時follow【現場－蘋果突發】 fb！ http://fb.com/applecitycrime