梁洛施（Isabella）自從同李澤楷生咗「小小小超」李長治之後，粉碎唔少港女嘅夢想。曾經同Isabella合拍電影《伊莎貝拉》嘅杜汶澤，噚日同王祖藍、許紹雄及徐天佑喺粉嶺皇后山拍新戲《人間喜劇》，杜汶澤話日前Isabella打長途電話畀佢報喜，佢話：「其實我哋有講過，有乜秘密都等見咗報先講，因為保持一個秘密好辛苦㗎嘛。」

好友提議生10個

Isabella生咗BB之後，心情勁靚，杜汶澤話：「喺電話聽得出佢好開心，梗係恭喜佢啦。」杜汶澤話俾呢個消息嚇親，問佢係咪一早知Isabella同小小超相戀？佢話：「我年紀大，以前嘅嘢唔記得咯，暫時未聽到佢提結婚，家佢為做好媽咪準備緊。作為一個監製，我梗係希望佢會復出啦，但係作為朋友就希望佢唔好做喇，呢行好難有得退休㗎，佢成21歲都唔細咯，生多10個啦，生多10個就開心喇。」Isabella同杜汶澤咁老友，記者提議不如叫小小超投資部戲畀佢哋合作啦，杜汶澤就話唔好：「難得人哋幸福，捧新人好過啦，佢都俾人邀請咗去生仔咯。」