木狼今年有唔少動作，其中最大嘅當然係球隊同公牛交易，換咗占美畢拿（Jimmy Butler）返嚟。話晒隊波係由前公牛教練泰保杜（Tom Thibodeau）領軍，咁佢對以前合作過嘅球員寧舍有興趣都係唔出奇，事關近排有去同木狼一齊練波嘅，咁啱又係前公牛嘅球員。

講緊嘅係控衛N羅賓遜（Nate Robinson），佢喺同木狼練完波之後上載一張相，相入面仲有另一位木狼新兵哥羅福（Jamal Crawford）。美國傳媒報道，木狼最近的確搵咗好多人去練波，但係暫時無打算要簽邊個。N羅賓遜上季喺D-League（依家改咗名叫G League）打波，上陣17場，場均得12.2分，另外三分波命中率就有41.9%。曾經喺NBA打滾11個球季嘅N羅賓遜，最近就喺委內瑞拉打波，上陣35場平均攻入16分，以33歲嚟講都仲係幾fit嘅！不過，木狼已經有泰亞古（Jeff Teague）同埋後備泰亞斯鍾斯（Tyus Jones）兩個控衛，真係未必再有位簽埋N羅賓遜就真。