大紫荊詩姑梁愛詩當年仲係律政司司長時，個名響港聞版就見得多，喺財經版就比較少見，事關見親都唔慌好嘢，今次佢終於出現喺財經版，而且唔係唔好嘢。噚日佢突然同「公職王」之一嘅張震遠，齊齊加盟俄羅斯鋁業聯合公司，出任獨立非執行董事。華華一方面覺得，俄鋁個幕後軍師都幾有計，識得搵香港名人入局，但另方面就有啲替詩姑擔心。
點解咁講？俄鋁上市嘅好日仲未摘定，因為股東之間法律訴訟同本身債務重組而遲遲未決，經已一拖再拖，雖則上個禮拜佢哋嗰筆高達74億美金嘅巨額債務，重組後終於搞掂咗，但前日港交所（388）上市委員會又話，都係要畀多啲資料睇吓，至決定批唔批佢上市，咁俄鋁到底趕唔趕得切搭尾班車喺今年上市呢，好成疑問！

公職王張震遠再添一瓣

俄鋁行政總裁兼大股東OlegDeripaska喺新聞稿話，今次委任嘅兩個獨董都係最佳人選；詩姑亦話好熱切期待運用自己嘅知識同經驗，協助俄鋁鞏固專注亞洲市場嘅鋁業領導者地位。不過，前司長最熟嘅始終係法律，商場從來唔係佢嗰瓣，今次仲要去到西伯利亞咁遠嘅俄國，都咪話容易做。
至於張震遠，佢檔商品交易所講咗成年幾都未有嘢trade，今次唔知會幫到俄鋁幾多呢？

李華華
mailto:[email protected]