羅富全第一季從練幾乎可以肯定打破，由其恩師蔡約翰所締造的首季開倉贏馬紀錄，果然係師承真材實料的蔡約翰。

回看羅富全練馬手法，又的而且確與冠軍馬房同出一轍。周日（10日）羅富全八匹上陣馬中，「肇慶威威」、「銘記心中」正正作出最佳示範。

周日係「肇慶威威」季內第11戰，之前十戰共取一W三P，後駒則作第12戰，本身季內已得三W，兩匹馬自加盟後成績同樣出色，係服役以來最好表現，共通點均同出自吳定強馬房（已解散）。

雖然季內已取得好戰績，但今次兩匹馬均有機會再下一城。第六場「肇慶威威」前仗大半程走外叠下贏馬姿態出色，谷草輸一場再返贏馬路程，絕對有能力施展回馬槍。

至於第三場「銘記心中」優勢更凸顯，今季三W分別於27、33、39分錄得，評分升至46分高位後，接着連輸七場回落到今戰38分，比季內贏第三W時仍低。

今次轉交貝湯美發揮，雖令人乏信心，但始終人馬之前合作過見合拍，埋門更加多一課泥地大閘才跑，求季內第四W目標清晰。