由於喀麥隆喺幾個月前,已經應承咗馬略卡會放伊圖返去踢西班牙盃決賽鬥維爾瓦。𠵱家喀麥隆亦遵守諾言,伊圖已經返咗去西班牙備戰,即係喀麥隆今日對哥倫比亞嘅洲際國家盃準決賽,幾可肯定無咗呢隻快馬坐鎮。
但係喀麥隆教練舒亞法就話,如果喀麥隆今晚真係咁好彩打贏哥倫比亞殺入星期日進行嘅決賽,到時就會運用國際足協賦予,球員每年要代表國家隊一定次數嘅權利,要求伊圖喺星期日返番去法國幫手。而事實上咁嘅安排,係同時「順得球會情」,又「不失國家隊意」噃!難為伊圖隨時要喺二十四小時內踢兩場決賽,你話如果兩場都要踢埋加時戰,伊圖呢次除咗有機會入到「健力士」之外,順便入埋醫院都得咯!
森多利亞因住步科木後塵
繼落實引入日本前鋒柳澤敦後,森多利亞日前一口氣再添當尼、迪安拿同埋當拿迪,陣容煥然一新。不過我求大俠覺得作為升班馬,應該好似前季基爾禾沿用升班功臣,然後再補充少數球員就夠,否則隨時步今季科木後塵,因人腳大變而影響戰績。森多利亞真係要自求多福囉。
羅馬會長成日發噏風
羅馬會長辛斯一聽到教練卡比路可能過檔皇馬,即刻扯晒火咁話:「如果卡比路走,我就開心到打觔斗。」事隔幾個鐘後,佢又話卡比路有人斟至代表有料到喎。另外,佢話買入盧斯奧原來係冇米粥。有個咁鍾意亂噏嘅會長,羅馬躉唔知好嬲定好笑。
巴夫斯添丁望喜事齊來
法國龍門巴夫斯嘅女人艾莉麗早幾日為愛郎誕下一子,令巴夫斯榮升老竇。巴夫斯就為咗見證人生最美一刻,所以冇踢到星期日對新西蘭場波,不過今日對土耳其就會復出。響球會級賽事,球員添丁之後往往即刻有好表現,即管睇吓呢件喜事會唔會帶挈到法國嘞。
紅軍獻技幼童買貴飛惡頂
我哋體育版收到利物浦擁躉嘅電郵,話難得愛隊訪港,決心帶埋兩歲半嘅囝囝捧場;後來佢知道一歲以上嘅小童同大人一樣要買五百幾蚊波飛(最高票價),覺得唔合理。呢位讀者引發我求大俠諗:無論本地及外隊比賽,唔佔座位嘅手抱幼童係咪應該豁免買貴飛?如果足總堅持,會唔會趕走咗好多想一齊入場睇波嘅一家大細呢?
愛華頓買斷李鐵勁吹
唔少國內傳媒連日來話愛華頓幾乎肯定買斷李鐵,講到言之鑿鑿。作為龍的傳人,我求大俠都希望佢可以響彼邦攞到張長期飯票。不過愛華頓官方網從未證實過呢件事,而李鐵自己都只係承認重傾緊,所以李鐵躉暫時都係唔好開心得太早。