韓國天團BIGBANG旋風襲港舉行兩場戶外騷，由於前晚首場大會安排超亂捱轟，昨晚尾場情況有所改善，更有約500粉絲在核心外圍睇免費騷，分佈鐵欄、碼頭天台、鐵絲網偷𥄫；而兩晚吸引眾星朝聖，楊千嬅自嘲年紀大企到腰骨痛，蔡卓妍見暈提早撇：「有史以嚟睇得最辛苦嘅一場演唱會。」

啟德郵輪碼頭舉行的一連兩場「BIGBANG10 THE CONCERT“0.TO.10”FINAL IN HONG KONG」演唱會，票價最高為2,188元，其餘是1,588、988及688元，前晚首場安排混亂，入場和離場都要呆等幾小時，觀眾狂插是史上安排最差的演唱會，事後大會表示前晚跟警方、保安各部門開會檢討，昨日尾場會加派人手改善措施。

昨午1時許，已有近200位觀眾在九龍灣排隊搭小巴，等了45分鐘才上車，沿途沒塞車，會場入口採分流措施，1至1,500號粉絲先進場，至4時不再採分流方法，觀眾排隊慢慢入場，情況尚算流暢，不過有女觀眾扭傷腳，開騷前被救護車送走，錯過睇偶像機會。
昨晚尾場於6時30分開始，有500粉絲於核心外圍睇免費騷，分佈於鐵欄後、碼頭天台和鐵絲網後擔凳仔偷贒BIGBANG，情況墟冚；而昨晚rundown有改動，開場時BIGBANG坐巡演車出場，不但核心內圍兩萬粉絲興奮，核心外圍的粉絲見到偶像繞圈一周，也興奮到尖叫拆天，之後勝利講廣東話，GD派飛吻冧觀眾。不過開騷後一小時，保安阻止外圍粉絲坐欄杆，並於鐵絲網前架鐵馬阻粉絲揭布幕睇免費騷。

其後GD表示：「今晚是好精采的一晚，是好好的回憶，多謝大家支持，講大家記得VIP made BIGBANG，thank you！」T.O.P說：「I will be back soon，這十年有很多回憶，過了十年好好的時光。」勝利就表示：「我們會再見，唔好喊！」
而BIGBANG的兩場騷吸引眾星朝聖，睇頭場的楊千嬅自嘲年紀大，昨在電話說：「我未試過企位睇兩個鐘頭，我又有番咁上下年紀，所以我條腰骨好痛。」周秀娜說：「覺得好渴，除咗飢渴之外，亦都係頸渴，由4點半至夜晚9點鐘呢段時間，我係一滴水都冇飲過。」

死忠粉絲連詩雅則說：「噚晚我最鍾意GD嘅solo，第二個就係T.O.P，知道佢就嚟入伍，心情有少少忐忑、酸嘅感覺。」而前晚睇騷途中見暈，要搭小巴早走的蔡卓妍（阿Sa），事後在社交網留言：「有史以嚟睇得最辛苦嘅一場演唱會！」昨日阿Sa到清水灣出席電影開鏡，皺眉說：「我噚日屙咗十幾次，去到又要等，企又凍，完騷前提早離場，沿途行去小巴站已經見幾個人暈低，上到小巴發現冇錢，好在有人豪11蚊幫我畀車資。」
採訪：文凱靈、馬建華
攝影：陳順禎