寒流下人人穿厚衣，但清早8時的沙灘上，一老頭只穿泳褲，拿着自製鐵扒清理蠔殼及碎石，再用膠桶拖到灘邊倒掉。「蠔殼拮腳，啲人游水會踩到，一定要清咗佢。要好多體力，所以唔覺凍，哈哈！」十六年前，烏溪沙是個荒蕪石灘，因為郭九這「愚公」的傻勁，才變成今天的模樣。
「以前呢度有好多大石，企都冇位企，我將啲大石逐嚿搬出海中心，跟住執走啲細石，再搵啲沙鋪番，變成家咁靚嘅沙灘。」78歲的郭九於96年首次踏足這裏，見海水清澈，很想落水暢泳，於是決心清走石頭闢出落水的路。「後來越來越多人加入游水，就執闊啲，執吓又闊啲，變成家成百呎。」萬事起頭難，郭九說最難是搬大石，須借助水力，用了七、八年才清理掉。

泳客感謝　樂上半天

「啲人見到我日日喺度搬石，當我傻佬，見我鋪沙又話嘥心機……哈哈！我又真係做到！」他說夏天有過百人在這裏游泳，不少泳客都感謝他，讓他樂上半天。
郭以前行船養大三子女，退休後瞞着家人天天執石，老婆三年前去世時也不知他這舉動。「冇刻意話佢哋聽，總之朝朝執完石游完水就飲茶，跟住買餸煮飯湊孫。佢哋知道咗都好支持。」太太離開後他更留戀沙灘。