艾威、林熹瞳同張文慈今日喺西九龍中心為主演嘅電影《我老婆未結婚》舉行宣傳活動，艾威喺台上好大感觸咁話入行40年，終於有機會擔正做男主角。而拍檔兼公司CEO嘅林熹瞳仲講到眼濕濕，話自己當初膽粗粗搵「綠葉王」艾威做男主角，希望大家買飛入場支持。

艾威受訪時直言心情患得患失：「今次可以話係一個開始，如果得嘅以後喺電影圈就有生存空間，最壞嘅就可能係終結，對我40年嚟嘅付出作否定，即係呢40年係白過，所以今次嘅成績對我、熹瞳同公司都好重要，要證明熹瞳嘅眼光冇錯。」艾威又話最自豪嘅係呢40年嚟佢都冇放棄過，相信有同樣資歷嘅人亦唔多。

至於林熹瞳就被問到喺製作同安排院線上映方面係咪遇到好多困難？佢話：「各方面都有壓力，希望大家多多支持，唔好因為睇咗艾威40年電視劇而唔買飛入場。」林熹瞳又話自己堅持要搵艾威擔正，當中都遇過其他人唔少質疑：「有人會問點解要搵艾威，我聽到好心痛，我哋公司好似大家庭咁，其中有成員畀人質疑令我覺得好唔開心。」講到呢度林熹瞳又忍唔住流淚。

至於正拍緊大台劇嘅張文慈就話：「我哋演員唯一可以做嘅就係落力宣傳，即使我拍緊劇都盡量度咗2日假出嚟幫手，希望全民撐艾威。」