區選候選人最後衝刺，佢哋嘅助選團員亦要隨時出動，港九新界四圍走。做乜都搏晒命嘅葉劉淑儀為咗幫親生仔新民黨「響朵」，住喺港島都殺入天水圍幫候選人拉票。要向朝早上班族拉票，助選兵團6點半就要現身，如果日日要葉太清晨時分飛車入天水圍，真係做幾多facial都補唔番呀陰功。
要威都要靚㗎，葉太點會唔識保養？原來佢每逢去天水圍拉票嘅前一晚，都會喺嘉湖海逸酒店過夜，貪朝早一換完衫落樓就可以開工。近期密密御駕西征嘅佢已成酒店熟客，暫定今個星期六晚會在天水圍行宮宿一宵，投票日準時出發，全日上陣拉票。