「今晚度地儀指數 2.71……睇番最近5月22日同一移欄賽事，當晚場地讀數2.70，第一至二場好地，三至八場好至快地，全晚除了『成才』後上贏馬外，其餘頭馬均守前五位入直路建功。」

上述是剛周三（26日）晚賽前《蘋果》app提到的場地預測，再睇埋早一次谷草B欄賽果，同樣有利內叠前置，但事實越跑越中伏。

第三場開始有「星運判官」及「轉數高」直路掟出中外欄追上包Q，到第五場頭二名「最驫」及「綠野先駒」入直路時守包尾兩位，之後一場又有「勤得兼備」尾二大外檔衝贏！

過往職業賭馬團隊愛死谷草，因為場地偏差數據穩定，但近季掉轉想割蓆，因為實際場地狀況不時開數據對面，難道「牛精大哥」一度兩倍唔夠，而「傳盛」升班初跑谷草得23蚊獨贏會是散戶出手嗎？

皆因就連人工智能，也認為場地大利內檔前置！所以，有戰友最近賭谷草，賽前索性不看場地相關統計，免得被「雜訊」擾亂視聽。

幸好，季中打後泥地賽開始回復過往宜放忌追明顯偏差。下周一（7月1日）第六場跑三班泥地1650米，「二郎」前仗於同程直領到底，上次升班跑同程排14檔極難跑仍有第二，今趟抽回1檔形勢大逆轉，如無意外可以補中。

另外，第二場五班1650米，「黃埔之星」上仗泥地1800米獲季乍現起色，上季跑三班泥地一哩強組放頭走只輸個多馬位，試準後今次肯走得快好世界，有力叩開勝關。

-----------------------------
7月4日起 《蘋果動新聞》只限升級壹會員閱覽
繼續撐蘋果！