劉德華同黃曉明合作套新片《偷天特務》（內地名叫《王牌逗王牌》）又喺出自導演王晶嘅手筆，秉承王大導嘅風格，膠位層出不窮。故事好簡單講述黃曉明間科技公司發明出上帝種子，但就俾犯罪集團搶咗，而飾演國際刑警嘅劉德華就要同黃曉明合作搶返上帝種子。

其實單係睇款大陸版海報，已經同之前上映嘅《皇家特工：間諜密令》（Kingsman: The Secret Service）幾咁似，就知套戲係集大成膠作，包括以下幾個膠位：

膠位一：
套戲擺明sell黃曉明有型靚仔，華仔同王祖藍全程做下把位。其中一幕華仔接受《職業特工隊》式嘅錄像任務通告，循例啲儀器會喺10秒內自動毀滅，不過身處廁所嘅華仔因為開唔到廁所門，最後連牆都穿埋。唉，一條卡通片都已經唔用嘅膠橋，居然由影帝演繹出嚟。

膠位二：
《偷》片聲稱喺歐洲等地方取景，不過睇得出好多CG製作都非常一般。一開始講華仔喺法國一間酒店被殺手追殺，窗外雖然見到巴黎鐵塔景，不過望落嗰背景好流。另外套戲嘅爆炸場口向大台膠劇《張保仔》致敬，嗰粒遇水就生長嘅上帝種子嘅開花結果CG，根本同《成語動畫廊》無分別。

膠位三：
有一幕講黃曉明俾反派捉咗，綁咗喺一個室內泳池邊，專做反派嘅盧惠光同臥底嘅胡然現身，佢哋喺盒度拎出一隻擺明係蠍子，但聲稱係南美洲毒蟲，夾硬叫黃曉明吞落肚。胡然去而復返粒聲唔出連翻十九幾個筋斗，跟住再游咗陣先同曉明咀嘴。胡然事後解釋咁做係要整熱個身，引番條毒蟲爬番出嚟，方便捉蟲。

膠位四：
曉明同華仔發現粒上帝種子收埋咗喺號稱全歐洲保安最嚴密嘅地方，結果華仔只喺走過隔籬大廈天台，用一個升級版銀色篋神一嘢彈過去。後尾反派梗係唔夠打要坐飛機逃走，華仔首先揸住電單車跳上曉明揸嘅直昇機，再跳咗入反派飛機嘅尾門，成個過程可以媲美關禮傑喺大台劇跳過對面天台嘅神跳。