香港大學學者早前喺大埔汀角發現全球獨有「汀角攀樹蟹」，連環境局局長黃錦星都忍唔住喺facebook分享新發現嘅「汀蟹」，仲吟咗首似詩非詩嘅句子「汀角攀樹蟹，拇指微細型，攀紅樹而棲，香港首發現，全球僅獨有。」

不過，因為汀角鄰近龍尾灘，有網民留言質問政府仲會唔會繼續龍尾填海人工泳灘計劃？星星局長就冇回答啦。
黃錦星最近日日喺facebook分享生態同環保資訊，上星期二傳媒報道汀角發現攀樹蟹，佢同日就喺facebook分享「汀蟹」照片，仲話發現汀蟹同政府環保基金資助生態項目相關，跟住就有網民留言挑機，「既然在汀角發現稀有品種，以及附近生態價值高，政府是否仍有意在龍尾建人工海灘？」局長10分鐘後留言分享有關「汀蟹」傳媒報道，似乎有啲尷尬唔敢正面回應囉。
汀角同龍尾位置接近，好多人都分享局長個post，順勢表達「撐汀蟹、護龍尾」心願，龍尾海岸教育中心擔心人工泳灘工程要挖海床、填海砂，會危及「汀蟹」存亡，香港自然探索學會呼籲政府叫停龍尾人工泳灘工程。