袁澧林、胡子彤今日到銅鑼灣誠品書店出席電影《白色女孩》特刊座談會，同場仲有攝影師杜可風同導演白海，袁澧林同胡子彤受訪時表示，呢本特刊內嘅相都係佢哋拍攝電影時劇照同鏡頭外嘅事物，全部由杜可風操刀，而且全菲林拍攝。

胡子彤話都希望日後有機會由自己操刀負責相集，但暫時自己仲未夠水平，佢話自己其實對攝影有濃厚興趣，會自己砌一部好簡單嘅相機出嚟，問到有冇幫女友歐鎧淳影相？佢話：「佢唔使我影啦，有好多人同佢影，佢有時會話我影得佢唔靚，不過o依家已經好咗好多。」而袁澧林亦表示自己係初次接觸菲林：「影出嚟都覺得好靚，曾經都自己試影過放喺社交網站上分享。」

講到聖誕，胡子彤話今年有時間陪女友：「咁啱我同佢都喺香港，所以會一齊過，不過未買禮物，而且覺得今日有啲唔舒服，一陣睇完醫生就去買。」袁澧林透露已經第三年同男友過聖誕：「不過我哋都唔興要送喺節日送禮物。」

更多娛聞，喺晒《娛果》
http://fb.com/appledailyent