短線遊:
有機農莊蚯蚓拎上手任玩

蘋果日報 2004/04/28 00:00


蚯蚓,樣衰衰滑潺潺,見到即時彈開三尺遠,但有無諗過蚯蚓糞便竟然係最天然嘅有機肥料?香港就有農莊養殖30萬條蚯蚓,攞蚯蚓糞便嚟種植各類有機蔬果,種出嚟嘅農作物,特別新鮮甜美。

記者:陳震霖 攝影:陳陶鈞 模特兒:Blanche、Yoee
30萬條「大平二號」齊齊排糞
個半月前,農莊從南京大學引入50盆約100公斤日本「大平二號」(EiseniaFoetida)蚯蚓,到目前為止已經養殖出300幾盆,如果一次過Show晒出嚟,成30萬條蚯蚓喺你面前躝嚟躝去,都咪話唔惡心;不過惡心還惡心,蚯蚓糞便係最天然嘅有機肥料,莊主揀日本種蚯蚓,就係貪「大平二號」體形細小,但「排糞量」比本地蚯蚓多,可以生產更多有機肥料。


蚯蚓糞粒最佳肥料
唔講唔知,蚯蚓係有機耕作至寶,原因有三,第一,蚯蚓糞粒為有機農業提供優質肥料,所含氮、磷、鉀、鎂比普通泥土平均高15倍,酸鹼值為中性,保水能力特強;第二,糞粒內嘅細菌能夠將惡臭毒性硫化物分解成無臭氣體,有助清除環境污染;第三,養殖蚯蚓有助翻鬆泥土,方便水份同肥料滲透,令農作更茂盛生長。
empty
■因為品種問題,日本種蚯蚓比起本地蚯蚓體形較細小。
empty
■蚯蚓天生見不得光,一見光即捐番入泥。


有機蔬果即割即煮
兩美少女開始對「大平二號」刮目相看,剷起一嚿濕泥,追問蚯蚓生活習慣,莊主解釋:「佢哋食枯葉、果皮、茶葉渣,鍾意喺濕潤泥土裏面捐窿捐罅,身體滑潺潺,怕光,以蠕動方法前進,食得愈多屙得愈多。」
現時,農莊內大部份田地都用內藏蚯蚓糞粒嘅濕泥種植,理論上唔使施肥,已經種到有益又有營養嘅農作物,Blanche見到大大棵椰菜、紅生菜、士多啤梨,口水都流埋,莊主話:「靚女,講咁多無用,不如整番個有機午餐,試吓用蚯蚓屎種出嚟嘅有機蔬果,係咪特別新鮮有菜味?」素食有機午餐,即割即煮,炒飯、清炒西洋菜、番茄炒青瓜、蘿蔔炒蜜豆、白菜湯,五餸一湯迅即下肚,Yoee食到舔舔脷:「勁好味,同平日街市嗰啲完全唔同,零舍Fresh兼爽口。」
empty
■300幾盆濕泥蘊藏蚯蚓糞粒,用作堆肥,變成最天然嘅有機肥料。
empty
■除咗灌溉用,山水經炭同沙石過濾後,可直接飲用。


抽氣扇打散人造霧水
睇完蚯蚓肥料,再睇露天儲水池,農莊有裝置收集山水,山水經自動灑水器,均勻灌溉露天及溫室蔬果。溫室裏面重有部打霧機,打出天然霧水,作用係減低室內溫度同保持蔬果濕潤。忽然有陣陣強風吹過,Blanche問:「做乜無端端開冷氣嘅?」莊主話:「唔係冷氣,我開咗幾把強力抽氣扇,等空氣流通啲,霧水分布得均勻啲。」
empty
■即割椰菜,每斤$30。
empty
■紅生菜每斤$25,啱用嚟做沙律。


參觀古代農具
離開溫室,兩美少女再參觀露天迷你展覽場,內裏有3部古時收割禾稻嘅機器,莊主介紹:「呢幾部係以前中國發明嘅農業機器,用嚟處理收割好嘅禾穗……」Blanche讀過中史,搶住話:「首先,將禾穗放入打谷機,金黃色穀粒就會喺禾穗裏面跳出嚟,然後將穀粒放入籠谷機,剝開穀粒外殼,最後擲入風車,就可以將外殼同白米完全分開喇。」全中!
empty
■人見人愛士多啤梨,每200克$30。
empty
■有機午餐,有興趣可以親自下廚。
empty
■打霧機打完霧,重要靠抽氣扇分散霧水。


香港蔬菜將有「有機認證標籤」
本港目前約有2,000戶菜農,其中只有40戶參與漁護署的「有機耕種轉型計劃」,佔有田地約16公頃,面積相等於200個籃球場,但每日平均只生產1.5噸蔬菜,只佔本港食菜量0.01%;為進一步推廣有機種植,政府已撥款近400萬,將由今年9月開始資助本地農戶申請「有機認證標籤」,最快明年初,市場將會有貼上這個標籤的蔬菜出售。
至於香港有機農莊柳莊主,亦率先向南京大學認證中心申請證書,證明農莊裏面所有蔬菜及蚯蚓,全屬有機養殖,證書亦有望在2個月內批出。
empty
籠谷機
■二人合作,一人放禾穗,一人轉動石磨,磨出金黃色穀粒。
empty
■展覽場隔籬重有兔仔場,有興趣可以餵白兔食蘿蔔。
empty
風車
■搖動在內的頁形風扇,形成定向氣流,將白米外殼完全打開。
何謂有機蔬菜?
根據香港有機資源中心有機生產及加工標準諮詢文件內容顯示,有機蔬菜必須符合以下條件:
1.農藥:禁用化學合成農藥。
2.肥料:禁用化學合成或含基因改造成份肥料,人類排泄物亦不可使用。
3.水源:應使用沒有受污染的水源灌溉,如不受污染的地下水。
4.防污染距離:與可能受污染的農地須有相距不少於2米的緩衝區。
empty
■看葉子可知蔬果是否有機種植,若有蟲蛀,即代表未受農藥污染。
香港有機農莊
地址:元朗錦田河背水塘
查詢及報名電話:27399786
入場費:包有機午餐每位$65;須專車接載,可於西鐵錦上路站或大欖隧道口上車,每位$80。
交通:元朗市中心或西鐵錦上路站,乘71號專線小巴($5.5),河背水塘下車徒步30分鐘直達。
empty