入境處受保安局領導,保安局局長係特首身邊紅人葉劉淑儀,呢位女士愈來愈要顯示女強人本色,作風強悍,對FCC明剃眼眉,唔怪得FCC主席TomCrampton發表聲明話:「作為一個投身於言論自由的機構,我們恐怕香港移民局已開始左右我們開展公開討論香港前途的努力。」
葉保安局局長嘅強橫作風,在強行推出反恐法呢件事上,表露無遺。面對議員質詢,佢話:「點對得住祖國?點對得住美國?點對得住英國?」(詳見《信報》,六月二十八日)嘩,咁講法,有冇對得住香港人呀?一方面佢嘅手下(入境處)盤問美國名牌教授四十五分鐘,另方面佢在立法會話「點對得住美國」,真係唔怕笑死人,相信美國佬亦俾佢搞到啼笑皆非。如果樣樣事都要對得住美國、對得住聯合國,二○○七年全面直選廢除功能議席,美國同聯合國一定唔會反對,你估葉局長會唔會幫手向政制事務局局長林瑞麟推銷呢?