向來視谷草為主場的方嘉柏，今期有六駒做正選，除了「進綵」外，其他五駒均屬近期跑得好的馬，主場又擺強陣。但凡強陣，一定會有潘頓份兒，不知大家會否感到奇怪，今次一隻都無用潘頓呢？

其實唔止今次，前周日（10月30日）亦無一隻馬配潘頓，二人自上周三（2日）「勝利名星」後，暫未有再合作，局外人不知原因！其他無騎開的馬，潘頓無份騎唔奇，但「罕曾見」是他騎開的，竟也改配田泰安，究竟無得騎？抑或因揀騎「電子群英」而唔騎？對我們來說，乃頗想知的事實真相。

「罕曾見」上仗表現絕不差，方嘉柏在操練編排上，也與同晚的廐侶略不同，特別編在昨日（7日）排位朝，才做最後試跑，上次同日跑的「越影」無跳，「全勝姿態」及「隨時候命」則早在上周六（5日）提前跳。這屬方仔不常見的操練編排，昨朝也見「罕曾見」在大圈跳得靚，唔急又醒神，狀態比上次更弗，卻料唔到會改用田泰安。

秤近績、近況，同場潘頓騎嘅「電子群英」無一瓣好過「罕曾見」，故仍會信後駒。方仔這晚更將「隨時候命」交到韋達手上，騎練破冰後，隔幾期今次又再有交收，馬未贏，前仗搏輸，上次回一回，今次換人再跑最有把握路程，隨時見真章！