當年今日
關於我們

資產價格 - 左丁山

蘋果日報 2009/12/22 00:00


賓架P在銀行家會所(BankersClub)請吃飯,欣然赴會,料不到在口竟要排隊,咁多年來,上過銀行家會所無數次,次次搭都好快,點解今次要排隊入呢?原來置地廣場升降機改用智能系統,大概係為咗保安理由啩,入之前,先要在外輸入樓層號碼(會所在四十三樓),A、B、C、D四部,入錯咗就一定上唔到四十三樓,因為午飯時分,不少人要同時行入同一部,其他三部就冇人入,你話幾冇效率呢?排隊之際,碰到幾位朋友一齊到達,行得慢嗰位就唯有等多幾分鐘啦。
置地廣場升降機全新安裝智能操控,製造人為擠塞,令人啼笑皆非。入到午飯房間,賓架P已在座,但佢隔籬,赫然有一位神秘嘉賓在,就係大賓架C。賓架C平時好唔得閒,搵佢吃午飯辛苦過乜,估唔到賓架P如此大面子,臨時搵埋佢嚟,咁又好啫,多一個人傾偈,可以聽多啲,但賓架C好醒目,未飲湯已講明:「千祈唔好寫!」
敏感嘢,講及私人嘅嘢就唔好寫啫,兩位賓架對目前經濟情勢嘅意見可以寫啩。我哋第一個疑問:目前有冇資產泡沫?兩位賓架異口同聲話:未見到,但驚住會有。理由如下:香港因聯繫滙率不能撤銷,美國行零息政策,香港被迫跟住行,零息對勤奮工作,努力儲蓄之人唔公道,長久實施零息政策,必然鼓勵居民從銀行儲蓄戶口轉錢去買樓,買股票,甚至炒樓,炒股票,搶高財務資產及房屋價格。呢啲搶高咗嘅樓價並不與經濟實體有關,而係與資金流向有關。賓架C話各國央行救市,大力減息,扭曲社會資源分配,最終導致泡沫浮現。
最近石鏡泉引述HenryKaufman嘅九十年代著作,指出中央銀行素來注重物價穩定(pricestability),所謂物價係指民生用品,生活消費價格,其實央行應該同時注重維持資產價格(assetprices)嘅穩定,忽視之,會招來禍患。考夫曼甚有遠見,格林斯潘掌權時,聯儲局一味顧住減息嚟維持經濟增長,除咗講一句「非理性亢奮」之外,冇股樓政策嚟防止資產泡沫,卒之釀成金融海嘯。