羅力威喺呢個月嘅31號將會同女友雨僑拉埋天窗，今日開始四出派帖，順道到商台宣傳新歌，啱啱錄好新歌，羅力威有空閒時間籌備婚禮，佢話：「我哋冇搵結婚統籌，場地聯絡都係我自己做，樣樣想親力親為，又未必唔係做唔到，雖然係攰，但好有滿足感。」

講到結婚當日儀式，羅力威話一切從簡，冇接新娘環節，主要係下晝喺淺水灣酒店行禮同酒會，大約四個鐘，將會邀請公司同事同合作過嘅伙伴同DJ約二百多人，夜晚再到另一地方同兩家摯親晚宴。為咗以最佳狀態見人，羅力威透露兩個月前買咗啞鈴返屋企操，o依家已經有腹肌，希望到時著衫會型啲！

唔知雨僑會唔會性感？佢話：「睇嗰日天氣，之前影婚紗相已經好性感，嗰日應該唔會再着番，不過我哋嗰日應該只係着一套衫。」佢又大讚太太好好，雙方父母又夾到，婚禮籌備中無任何麻煩事發生。度蜜月方面，佢指平日兩人太忙，連食飯都快食，例如落街快食叮麵，所以未必有時間去度蜜月。至於婚後會否全力造人？羅力威自言對小朋友有愛心，但未必有信心做好榜樣，但係佢話太太一定係好媽媽，兼且學歷高，可以負責教育方面。

精選娛聞，喺晒《娛果》
http://fb.com/appledailyent