App世代，就連保護自然環境都關App事。新鴻基地產綠色力量合作，開發咗香港首個以郊野及海岸清潔為主題嘅免費流動應用程式「山‧灘拯救隊」，鼓勵市民若發現有垃圾堆積嘅海岸或郊野，可以上載資料到此流動應用程式，等公眾知道黑點所在同其他有用資訊，自行或組隊參加或舉辦相關清潔活動。

新地執董郭基泓都有出席活動啟動禮，呼籲公眾download個app，相約家人同朋友齊齊接觸大自然兼清潔山灘，成為山灘拯救隊一份子，寓郊遊於環保。查實佢都不時參與清潔活動，例如多次到龍鼓灘進行清潔。綠色力量副主席文志森就話呀，郊野及海岸垃圾問題除咗破壞景觀，野生動物更有機會誤食垃圾，壞處多多，單靠環保團體力量並唔足夠，希望全民都關注。