今屆港姐因為出現一個「十優港姐」麥明詩（Louisa）而受到注目，外界更睇好她「冇得輸」，一定攞冠軍。前晚16位入圍佳麗在將軍澳電視廣播城集訓至11時多才離開，她們乘搭接駁巴士到將軍澳站落車，傳媒焦點當然落在Louisa身上，令到其他佳麗淪為配角備受冷落，人人都要先行彈開「退避三舍」。
之後Louisa與其他3位港姐一同進入港鐵站內，惟獨得Louisa找不到八達通卡，要狼狽地在閘口不停摷手袋，被問是否冇八達通？她笑答：「有。」原來八達通放在銀包內，她要專登「掹」卡出來「嘟」入閘。
入到車廂，起初Louisa都好似生人勿近，後來才與其他佳麗站在一起，她在調景嶺突然落車轉乘的士，直駛尖沙嘴寓所。Louisa昨早在Instagram留言：「其實我以前返學日日都搭地鐵……只不過係見到記者朋友有點不知所措咋！」

牛雜妹未揀定簽邊間

另外，未能進入港姐複選的「牛雜妹」李美琪（Monnie），昨日在柴灣擔任梁思浩主持的nowTV節目《娛樂審死官》嘉賓，她透露獲多間娛樂公司接洽，Monnie說：「未講條件，希望簽完真係幫到自己，唔係等工作被投閒置散。」她笑言要思浩哥多多關照，問她不入選港姐是否更大自由度及空間發揮？她說：「每件事有兩面睇，感恩多咗機會，都係意外收穫。」她亦不擔心會被起底，自言返工放工生活簡單。
採訪：吳耀輝、馬建華
攝影：黃曉程