【建制谷23條惡法】張堅庭曾拍《表姐》稱死得：一係放棄喺香港拍戲
蘋果日報 2020/03/31 19:18
林鄭月娥張堅庭基本法惡法
正所謂「無風不起浪，事出必有因」，近日建制派立法會議員何君堯忽然力推《基本法》23條立法，基本法委員會前委員饒戈平亦疑向港府「施壓」指國家安全越遲立法代價越高，「惡法」風再吹！泛民批評港府至今對推動惡法仍死心不惜，反映政府至今未吸取03年推動23條惡法失敗的教訓，指落實普選是港府最重要的憲制責任，批評林鄭上任至今卻隻字不提。
林鄭月娥今早在行會前見記者被問到，是否有計劃或時間表要在任內完成立法，在《基本法》頒佈30周年、香港特區成立超過22年之際，林鄭直言：「一條維護國家安全嘅憲制性條件要求，我哋都未能夠達致，呢個當然係可惜同埋遺憾。」令全城譁然，皆因基本法第23條講及國家安全，包括叛國罪、分裂國家行為、煽動叛亂罪、顛覆國家罪同埋竊取國家機密等等，被認為是侵犯人權，讓人感覺以言入罪，2002年北京要求港府立法，以至2003年七一遊行有50萬人上街。
導演張堅庭及歐文傑今日接受香港電台《視點31》訪問，被問到他們身為電影創作人，日後會否有多些考慮，張堅庭直言：「一到23條，我自己都要諗一諗，一係我就放棄咗我嘅創作，如果23條呢……」歐文傑指一指張堅庭，續道：「會追究，佢可以追究你。」
張堅庭瞪眼說：「如果要追究，我唔知呀！譬如我拍咗四集電影《表姐，妳好嘢！》一定死得喇！呢啲係反黨、反人民，如果呢個演繹係咁嘅話，我覺得喺而家呢個階段，應該香港嘅法官，以我呢個case，但23條去到國家安全嗰個空間，因為香港人係地方意識，冇乜國家安全呢個觀念，拍戲最重要係越癲越好、玩得越大越好，如果去到咁嘅情況下，要睇吓23條同我哋創作有咩矛盾。」
張堅庭稱自己只是創作人，並不是「烈士」，他認為到時或許要另謀出路：「如果我驚，一係我就放棄喺香港拍戲，然後搵第二個機會，只可以係咁做，我唔係烈士，我都會怕死，唔知點去演繹嗰個國家安全標準，我惟有係放棄。」
主持人指張堅庭的決定比較無奈，歐文傑解釋：「其實好多地方有啲電影，好似伊朗都有電影同個政府對着幹，嗰啲都捉得好緊，譬如今日中國，亦好犯禁，咁電影工作者都會繼續用佢嘅方法，去搵方法處理，你話23條嚟到，大家會覺得，喂！究竟要點做！之前講嘅白色恐怖、自我審查，甚至嗰啲條文，去到嗰個位，大家一定會更加驚。」
歐文傑亦相信新一代香港人有許多創意，可能找到一些方法解決，「可能未必經院線，可能出外發展，或者身在外地，好似張導演去外國發展都係留下勇武之軀，繼續拍緊一啲為大家、為人民發聲嘅電影。」張堅庭指不同平台變得有機會發展。
主持問到是否要轉移陣地，估計到香港將來不像以前，張堅庭覺得要創作自由，才有百花齊放的產品，「我哋睇吓以前嘅香港，同埋以前嘅南韓比較，以前佢哋學我哋拍電影、拍商業片，到而家我哋連腳尾都跟唔到，佢哋嘅創作能量已經Bang Bang聲，創作人都要搵一個空間畀自己。」