蕭潤邦（Oscar）今日迎娶江若琳（Elanne），同佢倆相熟嘅張繼聰同老婆謝安琪（Kay），今日亦有為新郎做兄弟，對於Oscar喺接受訪問嗰陣，話一班兄弟喺接新娘嘅時候冇幫過自己，阿聰就笑住話：「新時代、新作風，我都有着美少女戰士衫，件衫過唔到我個頭都夾硬嚟，同埋我都企得好前。」不過佢又笑住話：「不過我又真係第一次見啲兄弟冇乜點頂，其實我哋都係想希望個新娘對老公有信心，希望Elanne睇到會感動。」

阿聰又指Oscar幽默又風趣，所以今早接新娘時都以一個輕鬆嘅格調完成，而本身有做Gym嘅阿Kay就話今朝有份抬花轎：「我哋仲好手尾到抬完之後泊好。」問到Kay係咪第一次做兄弟？佢話：「係第一次做伴郎，今次負責keep婚戒，我好交帶o架，又唔貪心。」提到今晚要幫手頂酒，阿Kay就話搵佢冇用，老公阿聰聽完即話：「有兄弟負責頂酒，我就負責MC同其他。」而阿聰又透露Oscar同Elanne父母呢組「四大天王」相處得好融洽：「尤其係Oscar同佢外父好好感情，好似今朝我哋起哄叫佢錫外父佢都有錫，今晚再encore先！」

另外，提到hmv結業，阿聰指零售部門已經結束，對於裁員方面，自己亦覺得唔開心，但對自己就冇特別影響，問到怕唔怕公司資金有問題？佢就話：「我同阿一係經理人合約，我會拍公司投資嘅電影，但我亦會拍出面嘅戲，所以冇特別影響，我嘅工作已經排到下年。」至於同阿一嘅合約到幾時？佢就話：「唔短嘅時間，但亦唔長，大家一條船都要支持，同埋我覺得阿一好有才華，每個人都會遇到唔同嘅路，我覺得佢handle到。」

向海嵐、謝天華、吳浩康、Laura、C君及未婚妻黃天頤都係座上客，少爺占就送上人情。

向海嵐話呢個禮拜連飲兩次，佢話：「我每次婚禮都好感動，新人未喊我先喊。睇住Elanne拍拖，跟住結婚，等住睇佢生仔。」問到恨唔恨嫁，向海嵐話：「我想有個夢幻婚禮。」至於Laura就暗示唔會同汪子琦過聖誕。C君、未婚妻黃天頤合照時，C君：「醜婦終須見家翁！」

精選娛聞，喺晒《娛果》
http://fb.com/appledailyent